Sunday, December 19, 2010

2010 Krismas chu ramthim lamah!

Thian duhtak te, ka blog tlawmte rawn tlawh a comment hlu tak tak ziak thin te, a hmasain in zavai a chungah ka lawm em em a, "ka lawm e", kan ti teh ang. Pathian hruaina leh venhimna avang chauhin kum 2010 chu kan hmang zo leh tep chu a ni tawh mai. Krismas leh kumthar hmang tura in inbuatsaihnate Lalpan rem a tih ang zela malsawm in tih hlawhtlin sak theuh che u rawh se.
Keini chhung pawh Pathianin rem a tih chuan Ramthim, Assam lama kan kohhran mission field lamah Unaute rawngbawlna hmun hmuhpui pahin U-A-Ma khuang vuak kan tum ve e. Kan programme ang te kan tih hlawhtlin theihnan Pathian hnenah min lo dilpui leh min lo tawngtaipui fo ka ngen ve tawp mai e.
Ruahman anga Pathianin rem a tih chuan 23/12/10 hian Gauhati lam pana chhuah tum a ni. kan kal tumna chu chuta tanga Busa darkar 6 vel tlan chauh a ni e. Kohhranho leh mission field a rawngbawltu te nen a Pathian pawlna hun hlimawm tak leh malsawm tlak kan neih theih ngei kan beisei a ni.
Kan zinna turah hian internet connectivity a tha vak lova chuvang chuan comment hlu tak tak te pawh ka rawn chhang thei lo maithei a ni, min lo hrethiam dawn nia. Pathian zarah damte in kumthar te kan chuangkai leh anga, kan la reply leh diat diat a ni ngai ang chu. Chutiang bawkin in blog te pawh ka lo rial rei deuh a nih chuan min lo hrethiam bawk a niang chu.
Krismas hman mai piah lamah hian a remchan dan angin mission dispensary lamah free clinic buatsaihte rilru chuan a ruahman deuh, a hlawhtlinna chu Lalpa kutah a awm e. Chu bakah chuan phairam thingtlang khaw nun leh behbawm lam te thlalak a tam thei ang ber lak kan tum bawk aniang chu. Remchangah kan la phhochuak dawn nia.
Tlang hran mual hran a awm ni mah ila, ringtu te chu thlarau thianghlimin min phuarkhawm thin. Thlarau pawlna thar changa, kan nuna chhinchhiah tlak Krismas kan hman theuh theihna turin, in tawngtaisak tawnna kan mamawh ber a ni. Lalpan malsawmin, vengin awmpui theuh che u sela, hun hlimawm tak in lo hmang theuh dawn nia.
Krismas leh kumthar chibai theuh u le.
JL Chongthu.

Saturday, December 11, 2010

Han thlir ve mah teh u.

Vawiin chu thil tul hrang hrang avangin bazar lamah ka vakchhuak a, ka thil hmuh thenkhat te hi lo thlir ve mai mai teh u. Ngaihdan sawi zui pawh a thiang e.

Ei theih nghal mai turin, a sa leh kawchhung, thuka chhuanlum nghal theih mai in an zuar bik a, buhchangrum nena kil hmiah mai a chakawm khawp mai, ten chhe lo deuh tan chuan.
Var tha ser sawr tak a ni, heti hian chinai an zuar thin.

Tuai-thur, a duh mi tan chuan tui tak. Vawksa nen han siam nam chem
chem mai ila. Ka chil a tiput vel mawle.

A uih lampang chu duhthusam, chi hran man hrang hrang,
ka duhzawng tak a la ni zui.

Choka hmanraw lampang pawh a hriam tha hlawm khawp mai.
Zawngtah ziahna hi hman a nuam reuh phian a.
Hei hi enge ni ta ang le? Han ring chhin teh le.

Hei hi chu ka hmu fo, in lo hmuh ve atan ka duh em a inkungkaih vak lo mahsela
ka rawn dah ve hram a ni. Hetiang anga hnawk karah pawh hian mahni
line chu an hre thei zel a ni awm si a le.

Khati zawng kha ni phawt mai teh se.
...khrum
JL Chongthu

Thursday, December 9, 2010

Angem!?

Kan nau pakhat chuan mathematics a thiam thei tlat lo mai a, loh theih loh in private tuition kan laksak a, hma pawh a sawn chak hle mai a. A tuition lakna chu sorkar sikul zirtirtu a ni a, a thawhna sikul hunbi tibuai khawp a private a zirtir tur a nei a, school a kal tlai phah in a ban hma phah fo thin. He thil ka hmuh hian heng zawhna te hi ka rilruah a lo lut a, enge in ngaih ve dan le:
  1. Zirtirtu thiam tak a ni a, subject a harsatna nei te a bik takin a tanpui thin a ni tihna a ni ber. Nu leh pa tamtakin an fak luai luai a, fak pawh a phu a ni. Amaherawhchu a hnathawhna ber sikul hunbi kha a ma private hna in a tihbuai tak siah chuan; private tuition a pek chu sual a ni angem, thil tisual a ni angem, eiru a ni angem?
  2. Sikul pakhatah chauh a thawh theih miau avangin a thawh ve lohna sikul, mathematics zirtirtu tha nei ve ta lo a zirlaite tan chhuan chhawr ve theih na awmchhun chu private tuition a lo pek ve chauh khan a ni. Nu leh pa ten private tuition pe turin va ngen ta sela, a ni khan, "keichu ka hnathawhin min phuar tlat si a, ka thei lovang", lo ti ta bur mai sela; kan dem in kan ngei angem? In duh leh mite harsatna hriatthiampui lovah kan chhuah leh si angem?

Hetiang dinhmunah hian a hna a thiam bik vanga ding thei a ni miau si a, a sawiseltu tur leh phunnawi tur chu mipui bawk kan ni. A chan hi chhe ve tak a ni a sin. A dinhmun leh a in siamrem dan sawimawi/sawifel sak tum dawn pawhin a lam tang emaw, a eptu nih kha kan chan theih awmchhun chu a ni mai.

Hna kawng hrang hrangah hetiang harsatna hi a awm thei ngei ang. Pumpelh theih loh chin a awm ngei bawk ang. Chutiang a nih si avangin "i ngaihdan leh rawtnate" han sawi ve chhin teh le.

Ka lawm e.

...khrum

JL Chongthu

Saturday, December 4, 2010

Naupangte Ngalfimin Dam rawh se.

Naupangte hi a tlangpuiin harhvang tha leh hrisel, na sawi zen zen lo leh tawngka mai pawhin an na nasa taka a chhawk theih khawp hial a tuarchhel an ni fo thin. Chuvang tak chuan naupang khumbeta a nat emaw, thiante kawm a a chhuahvah peih loh hi chuan an damlo tak tak emaw, buaipui tham tak a tling fo thin. Hei hi puitling lam hian kan hria a nih pawhin, kan ngaihsak tawk em tih hi inzawh nawn fo thin a ngai. Khawsik sa vut vut leh tlun hluah hluah an nih loh vang mai a, ‘a tha leh mai ang’, tih ringawt hi a tawk lo tih i hai lo ang u.

Naupang thanglai hi damlohna, natna, harsatna leh chetsual theihna tamtak in a hual vel reng a ni. Thenkhat pal zam ngai chin a awm a, thenkhat te lah an rahchhuah hun rei tak (thla, kum) hnuah a langchhuak thung. Heng thil chi hrang hrang hi sawi sen leh sawi kim theih a ni si lova, ka vei zawng leh ka tuina tlem a zawng sawi ka tum a ni. Tun tum atan chuan natna pakhat kan sawi phawt ang.

Ruh Khawihli: A hming hi a mak kan ti deuh maithei, a saptawng chuan osteomyelitis a ni. He natna hi rin ai daihin naupangah a hluar a, enkawl hma loh phei chuan a benvawn a, naupang lo thang lian zel nunah kawng hrang hrangin harsatna a thlen thei a ni. I han bihchiang dawn teh ang.

Bacterial infection vang a ni tlangpui. Natna hrik dang te pawhin a thlen thei a ni. Malpui leh ngalruhah a hluar ber a, chu pawh chu khup emaw malpui ruh chuaktuah hnaiah a ni tlangpui. Natna hrik hi, naupang taksa bung hrang dang, entirnan; tonsil na, beng kherh, awmna, vun khawihli etc, atang thisen zama kal in heng ruhah te hian a inkhuar thin a ni.

A tira kan sawi ang khian naupangte hi an harhvanga, an kum a phu lo ten an che nasa thin. An ruh hi thanglai a ni a, an chet nasa lutuk hi ruh chuan dawl loh chin a lo nei thin. Hei vang hian langchhuak si lo hian ruh lian hmawr lamah hian hliam sawitham loh an nei fo thin a, chu lai hmunah chuan natna hrik thisen zama leng velte chu an inkhuar a, naupang hriselna tlema a lo hniam deuh chuan hnai la in a rawn langchhuak ta thin a ni.

A zawng a za chuan he natna hi a langchhuak mai chuang lo. A then chu taksa chakna avangin a tawp mai a, thenkhat te hnai la in an tawp a, thenkhat te erawh chu buaipui tham khawpin an benvawn a, harsatna tamtak a tuartu in a paltlang phah thin. Naupangin a lo vei hlauh a nih chuan hriat leh hmuhchhuah hmain kawngro a zu hle a ni.

A tlangpuiin naupang chuan inhliam palh vang ten khel leh khup bawr velah na an nei thin a, hei hi khawsikin a zui thin. Ni li-nga velah chuan a na lai chu a lo vung lian tial tial a, tur ut ut khawpin a nat belh a, vun te a tang mar put a, hnai la in a dup lur zui thei a ni. Hetih hunah pawh la enkawl an nih loh chuan vun paltlangin a rawn hnai chhuak ta thin a ni. Khawihli dang ang lo takin hei hi chu ruh chhungril, a tuamtu har leh tihrawlte rawn paltlanga hnai a nih vangin engkawlna pawh a duhrei hle a ni.

A tan tir te a enkawl a nih chuan langchhuak khawp a hnai la kher lo hian a tawp thei a ni. Hnai a rawn lak tawh erawh chuan enkawl hun chhung erawh a duh rei hle thung. A thla tel meuh enkawl a ngai tawh thin. Pan chhia, hnai la reh thei lo leh ruh mawih tih tliah palh hlau reng reng a dimdawi taka enkawl ngai taksa rihna pawh la thei lo khawp a derthawng pu in a tuartu chu a thuanawp thei a ni. Heng ruh hnai la te hi an lo tliah palh hlauh phei chuan ruh hrisel pangngai tliak ang nit a lo chu enkawlna a duh rei lehzual a, a tuartu chu vanduai DOUBLE a ni ringawt mai. Hetiang chin thlen meuh hi chuan a tuartu leh enkawltu tan pawh buaipuitham tak a ni tawh a ni. Chuvang chuan hmuhchhuah hma leh enkawl hma tluk a awm lo tih hi hria ila, nu leh pa, pi leh puten kan tu leh fa te, hetiang dinhmuna an awm palh hlauh loh nan hma i la ang u.

Hriatchian a tulna chhan te:
1. Natna benvawn leh enkawl buaithlak tak a ni thei. Hun tha leh sum leh pai tamtak a ral thei a ni.
2. A tuartu mi piangsualah (ruh-rel) a chhuah thei a ni.
3. Naupangin nunphung pangngai rei tak an pawl pha lo va, zirna thlengin hun rei tak a nghawng thei a ni.
4. A tuartu tan a hrehawm em em a, a rei hnuah phei chuan na si lo, in dim ngai si natna a ni thin.

Enge i tih ve theih:
1. Naupangin intih sual palh vang emaw, chhan awm lem lo vang pawh a an taksa bung hrang hranga ruhna an neih chuan ngaihthah suh. Khawsik in a behbawm phei chuan mithiam entir vat a tha. A vun tul emaw hnai a lak thleng a i nghah chuan a pawi viau ang.
2. Hetiang insawiselna an neih hian; nuai te, zut te, tuilum ip a deh te leh, hnawih chi chi hrang hrang hman loh hi a tha. Hetia tih hian a natna kha a punlun tir a, hun hlu tak hloh na a ni thei. Ruh khawihli a lo nih loh tak pawhin a tha chuang lo a ni.
3. Rinhlelh leh ngaihthatlohna i nei a nih chuan a rang lama mithiamte pan thuai hi a finthlak hle a ni.

Naupang lo thang lian zel tur te, ngalfim a an dam theih nan i mit meng la, i beng i chhi thin dawn nia. An na leh hliam te, ‘a dam leh mai ang’, tih liam sak mai lovin nakin hun thlenga an tan a harsatna thlen thei te a ni palh mial em ti a hriatchian sak leh a tul dan ang zel a hma i lak theih nan he thuziak tawite hi i lo hmang tangkai a ni ang chu. Zoram nuam kan siam theih nan “Naupangte, ngalfimin dam rawh se”.

...khrum
JL Chongthu.

(He thuziak hi Scientific article a ni lova, bengvar nan leh kan ngaihtuahnate chawk tho tu atan mai a pawnlang tak a ziak a ni zawk e.)

Wednesday, December 1, 2010

Tar leh Upate Ngalfimin Dam Rawh Se.

Masi thla han chuankai meuh chuan khua pawh a vawt ve tan ta riau mai. Patling pawh zan lam pangah chuan kekawr bul khup chen tal hak a ngai ve ta. Naktuk lama kan damlo zai tur te ka zirchiang a, ka thil chhiar tlem a zawng, tangkaipui an lo awm mial takin kan BLOG zuai teh ang tihna rilru in min bual leh tlat pek mai.
Ka thuziak tur hi internetah hmuh tur a awm a, magazines ah pawh chhiar tur a tam mai, amaherawhchu kan zawng a nih ngawt loh chuan kan chhiar zen zen dawn lo va, kan ngai pawimawh kher lovang. Chhungkuaa tar leh upa te nen a cheng ho kan nih chuan hriat ve mai mai atan erawh a tha hle ang. Heng te hi lo hre ve mai mai ta la.
Malpui ruh chuktuah tliak: India ramah statistics kan nei tha lo va, america, ram changkang zawka kan ngaih lam statistics hi lo thlir ho ta i la. USA ah chuan kum tin mihring 2,50,000 in an malpui ruh chuktuah an titliak a ni, a ram pum atan chuan a tam lo hle maithei. Mizoram mihring hmun li a then a hmun khat ang vel lai chu a ni lawi si. Health care a an sum sen tamna ber pawl pawh hetiang ruhtliak enkawl hi a ni.

Mipa ah chuan kum 72 leh hmeichhiaah chuan kum 77 bawr vel ah a tliak tlangpui. An standard of living (SOL) leh life expectency (LE) a sang a, a tliah hun a tlai mai a ni. Kan ram angah te hi chuan, kan economy, SOL, LE, leh chhan dang dang avang te in hei ai a hma daih a tliak thei turah hian a ngaih theih, dik pawh a dik tlangpui. Chuti a nih chuan kan khawtlangah susceptible population an tam ve sawt viau maithei a ni.
Heng ruhtliak zing a za a sawmriat (80%) hi chu hmeichhia an ni, a chhan bulpui ber chu Osteoporosis vang a ni (Post hmasa lamah ka ziak ve nual tawh a). A tam zawk te hi chu inchhungkhur a tluksual satliah palh mai mai vang a tliak a ni. Naupang lam deuh a hetiang ruhtliak hi chu motor accident leh thingkung/inchung sang atanga tlak vang te a ni tlangpui.
He ruhtliak hi ngaih pawimawh a tul em em na chhan chu:
  1. Ruhtliak zawng zawng belhkhawm a enkawlnaa senso za a sawmli panga (45%) vel hi hemi atan hian a ral thin a ni.
  2. Tar leh upa te nun; quality of life leh nitin a an nunphung/nunkawng (activities of daily living) nasa takin a ti thuanawp a, chhungkua leh mimal tan a buaithlak thei hle a ni.
  3. Hetiang ruhtliak tuar tan chuan a hnu leh a ruh dang tih tliah na chance a tam bik hle a ni.
  4. Ruhtliak enkawl chhung a khumbet leh che tha hleithei lova rei tak awm chang a awm thin, hemi kaihhnawih bawrhsawmna in a tlakbuak chuan a tuartu tan a hrehawm a, a enkawltu tan beisei a tawi hle thin.
  5. Hetiang ruh tliah hnu hi chuan life expectency nasa takin a tlahniam bawk thin.

A dang chu sawi tawh rih lo mai teh ang.

In inchhungkhurah emaw, in chhung hnai tak te, tar leh upate an awm a nih chuan; ei leh in tur i tlin phak ang a tha ei tir la, thawk hah lutuk lo a awm awl tir tum bawk la, an taksa in a tlin tawk awm te in exercise lak te i tihpui thin dawn nia. Chu mai bakah chuan, nitin an chet vel naah tluksual inchhuih bah palh awm lo turin fimkhur turin hrilh chamchi la, a theih chin chin ah i veng zel dawn nia.

Tar leh upate NGALFIMIN DAM RAWH SE.

...khrum

JL Chongthu.

Monday, November 29, 2010

Bawp khawkherh a ruai theh!


Ka vanneih a siam in meitei inneihnaah chaw ei tur a sawmna ka dawng hlauh mai a, kan va kal ta a lawm le.

Chhuatah vai puithiam bawp khawkherha thu ngat a ei ngai kha a lo ni a, fit lo deuh tan chuan a huphurhawm viau ang. Fit zek zawk, riltam raih mai a kal kan nia kan hmaa min hlui ang ang kha chu kan lim liam duak duak mai a ni ber e.

Thutna tur kha chhuatah pher seipui mai hi an lo phah zur mai a, chu mi hmaah chuan balhla hnah zai bial ah hian chaw leh chawhmeh ei mai theih khan a lo in chap dal mai bawk a, a tuihnai hle mai. Tichuan bawp khawkherh chuan kan han thu sap sap a, kan zinga upa ber chuan an bar tan a, midang ten kan ei ve thei chauh a ni.

Hetiang nikhua hian chawhmeh hi thlai chi hrang hrang a siam leh sangha chi li vel tal a ni tlangpui thin. A tira min hlui hi puarpui tham zet a ni. Amaherawhchu buhduh tih takah chalrang ho chuan, a hmei a pa in an dawhbelh tlangpui an ti. Chaw leh chawhmeh hi an rawn sem reng a, a thlaphan awm loh hle. Kan han ei mawlh mawlh a, tuman engmah an lam tawh loh chuan CHI an rawn sem a, chu chu chawhlui kil kharna a ni; chumi hnu chuang chawhmeh engmah lam nawn a thiang tawh lo e tihna ang a ni. Kan kham ta maw tihah, upa ber bawk a tho hmasa a tichuan midang an tho ve chauh thin.

Ka thil hmuh thenkhatte:
  1. Chaw/ruai buatsaih vel tur hi an hnamah mi bik (Brahmin an ti mai) an awm a. Heng ho hian lu, hmui leh hnar puana tuamin chaw ei an siam a, chaw ei te an vil a, kut vekin chawhmeh (tuiril lo) chu an sem a ni.
  2. Chaw hi muangchanga ei tur a ni, eng sawi sek sek lo in chaw i nei tlem deuha an hriat chuan an rawn pek belh hnawk ang che.
  3. Chawhmeh reng reng la ei ngailoh a nih chuan bul a thu, chinchang hre deuh zawh mai a tha. Mizote tan erawh a ei theih vek ka ring thung.
  4. Sangha an siamtui hle, a ruh nawi a tam a fimkhur taka ei a ngai thung.
  5. Chawhmeh item 10-15 tal a awm, temkual pawhin puarpui tham a ni.
  6. Thutna dinglama tui leh a tawpa dessert an rawn suah khi kan chan tur a ni.
  7. Mahni thleng/hlui a nih ang anga kalsan tawp mai tur a ni.

Ka ngaihdan thenkhatte:

  1. Ke lawng, mawza buna inhnaih tak tak a thu kan ni, thutpui thlan fimkhur angai hle, Ke uih deuh bula thut chu chuti hlauh.
  2. Chawhmeh chuangbang leh ei lem loh a tam duh hmel, sum seng a lei vek a ni si a a hautak phah ngawt ang. Chawhmeh tlemte, buffet system hian ti ve ta sela a ziaawm phah sawt ang. An hnam kalphung kalsan mai hi harsa an la ti ve ania nge.
  3. Bawp khawkherh a thu ngai lo tan chuan chaw ei chhung chauh han thut pawhin ke a lo mu chuah chuah hman a, thawh thut a tluk sual mai palh pawh a hlauhawm. Zawimuang a fimkhur taka thawh a finthlak hle ang.

Chaw ei tui u le.
...khrum

JL Chongthu.

Friday, November 12, 2010

SIKNI ENG MAWI A LO LANG LEH TA: DAIH MAI A!

Thlasik khawro leh boruak vawt nuam si chu kan thleng leh ta reng mai maw.Vun ro leh mawm pawh sawi theih lovin a hmei a pa in cream leh lotion kan inchulh mawm leh thlip thlep mai dawn a nih hi. Ke uih leh pheikhawk bun uih thin tan phei chuan hun huatthlala awm tak a ni. Kan hriat sa belhchhah nan thurawn tlem a zawng in chhiar ho leh ang u hmiang. A hre tawh kan tam ang, hre lo pawh kan lo awm mial mahna. A chhawr tangkai duh tan hman tangkaitheih a ni thei maithei bawk. Khai aw...
Vun ro: Mitin deuh tho hian kan buaipui, naupan lai phei chuan chat khi thip te kha thlasik ti hrehawmtu pakhat a tling thin. Kan vun nihphung a inang lo a, a ro dan pawh a nasa in a in nep hleih ngei ang. Thla a lo sik in khua a lo vawt a, boruakah humidity a lo tlem a, vun a ro duh hle. Chu mai bakah chuan khawvawt a kan taksa lumna kan hloh lohna turin vun a thisen zam te an lo chip cheih a, taksa tuamtu vun lumna a tlahniam a, boruaka tuihu awm ang ang pawh in vun vawt thler chu bawh bik tang e ti hek suh, a ro ngawih ngawih mai a ni. Pathianin kan hun tawn mil ang zel a kan taksa tana tha tur a a ruahman dan a ni miau si a le.

Vun ro lutuk lo tur a kan tan angai tihna a ni mai. Thenkhat ten ei tur mawm leh tuihnang tha ka ngeih an ti, a dik viau ang. Hei hi chuan lak kawih leh zawm sual palh theih a nih vangin sawi zau ta lo ma i la. Amaherawhchu, kan taksa in vun atang tuihu engemaw zat a hloh ve reng a ni tih hria in thlasik lai hian tui in tam hi a tha hrim hrim a, thlahthlam loh tluk a awm lo. Tuivawt kan in thei lo a nih pawhin tui lum emaw, thingpui, emaw coffee. Intur dang chu sawi tawh lo vang, phur pui tur kan tam em mai! Tui in tam hrim hrim hi taksa tan a thatzia chu inhrilh nawn angai lo. Rahbi pakhat chu kan rap phawt e.

Vun mawm tha, ro leh chat a khi mai mai lo tur nen a thlasik kan paltlang duh anih chuan body lotion hi regular taka hman tur a ni. Kan hmang theuh! Inhnawih dan hi uluk angai thung ka ti daih teh ang. Lotion hnawih dawn hian a theih hram chuan insil fai hram thin a tha, a tluk a awm lo. Inbual zawhah a tih chi viau dawn tihna a nih chu. Vun kha a ro thak thleng a inhru lovin, la hnawng deuh chep a nih thleng a inhruk phawt tur a ni. Chumi chungah chuan lotion/cream kha inchulh/hnawih tur a ni. Hetia kan tih hian kan vun pang a tui tlem lo la awm kha kan thil hnawih khan a up bet a, chu chuan kan vun a tihnawm in a timawm tha lehzual dawn a ni. He step pawimawh tak hi mi tamtak ten kan hmaih thin avangin kan lotion inhnawih te tangkai lovah kan ngai thin a ni.

Heh rep ah pawh chutiang tho in, hmui tlema liah huh deuh hnuah lip balm, creams ang chi ho hi hnawih mai tur a ni. A tihdan dang chu kan hre theuh awm e!

Tuilum hman thin hi a nuam phian a, mi tamtak te phei chu a lo in kan awm thei awm lo ve. Tuilum a insil leh inbual hian kan vun temperature a tisang a chu chuan vun a thisenzam awmte a tidul a, hei hian kan taksa lumna mai bakah vuna tuihu awm ang ang te boruakah a tiral thin a ni. A hnu leh chu vun ro neih a ni tawh mai! Tuivawt a inbual khuk chum chum te hi nuam ve deuh a nia sin.

A tir lamah khian vun a vawh chuan a ro kan ti tawh a, vun a lum in a ro i ti leh te pawh in ti maithei.Tuilum hman vanga vun lum hian a daih chhung a rei lova, vunin boruaka tuihu a hip hun daih lovin kan vuna awm ang ang tuihu bo na hun chhung ang vel chauh hi a daih thung a ni. Chu mai bakah chuan vun kha kan tui hman khan a tihuh a boruaka tuihu leng a tlem hrim hrim bawk nen, huh belh leh chuang tur a awm tawh lo. Kan ihruk hul meuh chuan, a lo vawt leh thler tawh a, a ngai te bawka bul tan ang kan ti leh mai. Chuti ni lova nileng leng a tuiluma kan inchiah a nih chuan a dan a dang ngei ang le.

Vun ti lum a, taksa atanga tuihu bo lo tawka vun vawng mawm tawk tur a inthuam peih leh thiam chuan lukhum, hmaikawr (zawngte lukhum/monkey cap), thawmhnaw lum leh mawza lum inbel mai hi a finthlak. Mahsela thluak lamin a temperature balance a tih ang tawk a kan regulate theih tak tak dawn loh avangin, a lumtawk chiah chu hriatthiam a har hle ang, balance lo tum ve chin teh.

Thlasik khawvawt nuam tak hi thenkhat tan hun tawrhhlelhawm tak a ni thung! Ke-uih thin te tan. Mi khawngaihthlak tak an ni; tamtak te chu kumtluana uih pawh an lo ni mahna. Hetiang mi te tan a thurawn tlem te ka hriat ve chu; Mawza lum lutuk bun loh tur, ke thlan a tinep a uih na chance a tlem. Tin ke fai taka sil a, kethiah kar hul taka hruk thlap thin tur a ni. A theih phei chuan antifungal powder ang chi hi mawza bun dawn apiangin phul thei ila a tha hle, mawza reng reng nikhat aia rei bun loh a tha bawk. Ke tin zuahsei loh leh fai taka tin kar kher thin tluk a awm lo.

Lalpian hun lawmawm tak lo thleng mai tur hi, vun ro chat khi chat leh buh thar hmui rim nam rum rum a ke rimchhe tel lovin hlim taka “U a ma” tlang dial dial turin sahmulphah thla chibai ka buk theuh a che u.

Vive Valeque.
...Khrum
JL Chongthu
12/11/2010

Sunday, October 31, 2010

Chawlhna tuikamah sangha man tur in.

Nitin maia mahni hna a kalkhat tak a hnathawh hi chu hriselna tan a tha lo tih kan hre theuh awm e. Official duty ni pah fawmin hmanni chu khaw hawizau leh chawlh hahdam nan kan thiante nen Jowai, jaintia hill ah kan han kal a, a nuam khawp mai. Taksa tan hahchawlhna a nih rualin rilru pawh a chawl veng veng a ni. Mahni hnaah theuh taima leh rinawm taka thawk thin te kan ni ngei ang. A chang chang a chawlhhahdamna hun hman thin hi thil tih chi leh chin tha tak a ni. I hriselna atan a tha a, i hnaa thawk hlawk zawk tur pawhin a pui ngei ang che. Chuvang tak chuan Aizawl pa pawhin Hmuifang tlanga thawk va lak te pawh hi tih awm reng a ni, changkanna changkang pawh a ni tlat.
Kan kalna hmun hi Nartiang a ni a, tlangsang lutuk lo hmun thengthaw nuam tak a ni thung. Helai hmun hi Jaintia Lal te sulhnu pawimawh tak awmna hmun, "Monolith" hmunpui a ni. Chiang takin ka lo chhinchhiah lo na in kum 300-400 vel a upa chu a niin ka hria. A hmun hi a pawimawh viau lai hian an cheibawl vak lo va, enkawlna pawh a tha lo angreng hle. An stateah pehteh a awm ve lo a niang saidawium ruak erawh a awm ve nual. Hetiang ang hmun te hi kan ramah hian nei ve ta ila engtin tak engkawl ang i maw? Entawntlak takin kan cheibawlin kan vawng tha bik angem le tih te hi ka rilruah ka inzawt ve mai mai a.
Kan pi leh pute hmanlai nun a zokhaw kawtchhuaha lungdawh ni awm tak tak te a lo zal khup mai a, lung phun chher mam em em loh a lo inphun fur bawk. A hmuna la kal lo te kan awm takin thlalak tlem ka rawn dah tel e, lo en ve chhin rawh u. Heng lung chi hrang hrang te hi a sakhat tha bawk a hetia en mai chuan thli leh ruahin a suasam lova, tlabal emaw kehdarh hmuh mai tur a awm lo. Chhan tha tak neia hetiang hmunhma siam hi an ni ngei ang le. Kum za tam kal ta a tlangram mi, engineer pawh awm hauh lohna hmuna mite han chawikual leh phun sawn vel a tan chuan an tumruhna leh an ruahmanna hi zirchian a chakawm hle a ni. Khawvel danga cheng ang maiin ka inngai a, a reh ruih mai bawk si a, a hahdamthlak hle a ni. Hringlang tlang te pawh ka mitthla zuai zuai tep a ni.

Zokhaw lungdawh te pawh a ang hle in ka hria.

A mawi hran lo, a dangdai thung a ni.
Kan tum tak angling tur chuan nartiang khaw dai mai a lui te pakhat, luang damdiai mai chu kan thleng a, chawhnu her atanga ni tlak dawn thleng chuan nghakuai chu kan han khai a, sangha man em em pawh kan tum lo, hahdam paha nuamtawla khuanu mawina chen mai a ni kan tum. Masheer zungthum bawk awm vel pali vel chu kan man ve ta hlauh a, chhuah leh ta lem lo chuan kan hem hmin a kan ei ta daih pek a, a zialo khawp mai.
Sangha man turin val chu ka in peih ta e .
Kan lui kalna hmun a nuam, lui a thianghlim hle bawk. A bulhnai khawmi ten tura hrai an khap a; a duh tan mahni kutkawih hmanrua ngei a eizawnna atan erawh an phal thung. Kan kal ni pawh hian naupangho in kaikuang awt in kaikuang leh sanghate chu an man teuh a ni. Taima deuh chuan chhungtlai an hawn mai zel a ni awm e.

Kaikuang awt, Ulawng pawh an duh ve tho.

Chawl hahdam tura kal kan ni bawka, nuam ti tak leh hahdam takin kan luikal chu tlai ni tlakah kan haw a, tun thleng hian ka mitthlaah chamin rilru min la chhawk fo thin a ni. Hung remchangah mahni awmna bul hnaiah hahdam nan in lo vak thawleng ve dawn nia.


...khrum
JL Chongthu.
31/10/2010

Monday, October 4, 2010

Hmeichhiate leh Osteoporosis.

Osteoporosis (Ruhmawih/Ruhduap) hi kum upat zel in a a ken tel ti ila a sual awm lo e. Mihring kan dam rei tial tial a, chutih rual chuan upat in a ken tel bawrhsawmna chi hrang hrangin mi a tlakbuak ve mek zel bawk a ni.

Osteoporosis hi kan ramah (India) hian a hluar hle mai a, mihring million 61 vel zet he natna hian a tlakbuak mek a ni. Heng zinga zaa sawmnga (million 30) hi hmeichhia an ni. Mithiamte chhutdan chuan kum 2030 ah chuan India ram hi khawvela hmeichhe thihul chin nei tam ber dawttu a ni dawn a ni; heng ang hmeichhiate hian osteoporosis an nei duh hle bawk a ni.

Osteoporosis hi kum upat zelin a kentel, mihring ruh nihphunga danglamna rawn inherchhuak, natna anga rawn langchhuak a ni ti ila a hriatthiam theih mai awm e. Mi a lo upat zel hian a ruh te a lo duapin a lo mawih a, chung ruh te chuan an chakna leh nelna te an hloha, ram in an tliak awlsam bik thin a ni; a bikin kungkuruh, malpui ruhchuktuah lai leh banrekah te a hluar bik a ni. Heng thil inthlak danglam hi hmeichhe thi hulah hian a langchhuak hmain a tam pawh a tam hle a ni.

Tute nge osteoporosis nei duh bik:

I. Hmeichhe thi hul chin te.
II. Hrisel loh vanga thi hul leh chhul-chibawm paih te.
III. Kum 50 hnulam a ruh tliak nei te.
IV. Ruhrel te leh cher leh ria te.
V. Ei leh in a Calcium leh Vitamin D tlachham te.
VI. Khumbet a damlo leh taksa mamawh tawka insawizawi ngai lo te.
VII. Meizial zu leh zu in thin te.
VIII. Natna benvawn avanga damdawi hun rei tak ei ngai te.

A lanchhuah dan:

Mihring taksaah hian langchhuak mai lo in kum tamtak a awm thei a, mi a lo upat zel a a ruh te a lo duap tak viau hnuah hian a nihna tak a rawn langchhuak thin a ni. Chuvang chuan he natna hi “Suattu ngawichawi” te pawh an lo ti thin a ni.

Heng ang insawiselna te hi i nei a nih chuan i ruh te chu an upa in duat an ngai tawh a ni tih hriat a tha ang:

I. Hnungzang na: tluaksual insawh leh intih palh vang emaw, chhan em em sawi tur awm lo pawh in.
II. Sanzawng hniam a inhriatna leh zangkul ta deuha i inhriatin.
III. Hnungzang ruh, kumkuruh, malpuiruh chuktuah bawr leh banrek tliak a awm in.

Heng kan tarlante hi nauvei pelh hnu a tuibawm rawn keh hun ang vel an ni. Chuvang chuan kum lama upa, (50 bawr vel) i lo nih chuan, i ruh te kha an chaktawk nge chaktawklo tih inhriatchian a tha hle ang. An chaktawk tawh lo a ni tih i hriat hma chuan a tul dan ang in ei leh in te, damdawi that te leh, nitin nunphunga a tul anga inthlak danglamin harsatna tamtak i pumpelh thei dawn a ni. I taksa i hmangaiha mahni i inngaihven that chuan i tan thlaphan nachhan vak tur a awm lo e. I ruh dinhmun diktak hretur erawh chuan thisen exam leh khawl hmangin mithiam ten hma an lakpui thei ang che, khawpuiah chuan a awlsam a, thingtlang lamah erawh chuan tum pawhin a theihloh thung ang.


Heng a hnuaia zawhna te hi han chhang ve chhin teh. I chhannaa ‘AW’ tih a tam viau chuan i tan osteoporosis neih a awl hle dawn a ni.

Zawhna (AW emaw AIH tia chhan tur).

1. Ka thi a hul tawh.
2. Kum 45 ka nih hmain ka thi a hul.
3. Ruhtliak ka nei tawh.
4. Kan chhungkuaah osteoporosis nei an awm.
5. Ka ruhrel a te, ka ria in ka cher.
6. Ka ei leh inah calcium ka tlachham.
7. Ka awm-awl, thlanchhuaka thawh vak ka nei lo.
8. Meizial ka zu.
9. Zu ka in thin.


Damdawi hmunpui leh khawpuiah te chuan inentira inenkawl zung zung theih a ni. Amaherawhchu thingtlang nu i niha hun leh hmun leh sum leh pai bakah rawntur remchang an awm lo a nih pawhin thlaphang duh hauh suh ang che. Mahni phaktawk zelah a invenin a in enkawl theih a ni.


Engtin nge hma i lak ang:

A chunga kan tarlan zawhnate khi i han chhang ta a, i ruhrel na them thum thin te leh i kum mila i inngaihtuahin osteoporosis hian engemaw chen chuan a tlakbuakah che ngai phawt mai rawh le. I tih leh tur chu tuna i ruh te kha an lo mawiha an lo duap zual zel loh nana hmalak a, mahni tanghma hai a ni tawh ang. Chu chuan awlsam te te a ruhtliak thei mai lakah te nasa takin a veng thei dawn che a ni. Mahni khawsak leh awmna hmunin a tlin ang zelin hetiang hian thuthmunah hma i lo la tawh mai dawn a ni.

Calcium ei rawh: a leina neiin an lei a, harsat deuhin WADI a mi an ei mai, a tum chu thuhmun vek a ni. Ruh tihchaka mawih zeltur ven a ni. Taksa tana thatna dang tamtak pawh a pai tel a ni.

Bekang, be chi hrang hrang leh bekang atanga chawtha eitur siamchhuah te hian ruh a tichakin nasa takin a mawih chhe mai tur laka a veng a ni. Chuvang chuan bekangsa te hi chawtha hlawm a lo ni reng a ni. Tin bekang hi um uih kher a ngai lo an la ti leh zel a.

Taksa ruhrel bung hrang hrang ten taksa rihna rualkhai taka an lak theih nan i din leh i kal te khan kun de du, zang kul hni hne lo in; nghawng ngil tak, khabe lut chaih, darh pharh, hnungzang ngil leh ngum kul tawk chiaha taksa phochhuah thin tur. Tin i thut pawhin hnungzang ngil at a thut thin tur a ni. Rit chawi dawn te hian kawng ngil at in khup inthlep a tangin rit lak thiam thin bawk tur a ni.

Inchhungkhur a ho te te a tluk(falls)avangin tar leh upa tamtak ten an ruh an tiltiak fo thin. Chutiang laka inven chu i tihmakmawh a ni. Pheikhawk sang lutuk bun loh in kawngro a su hle. Tin chhuat nal a kal leh step a chhuk chhoh te hian vawnchhan/vawnban dawma kal mai hi upat lamah chuan a finthlak mai bakah a tul tawh bawk thin.

Ruh na neuh neuh te i neih chuan ngaihthah emaw ngaia nei mai lo in a theih chuan mithiamte rawn a enkawl vat a tha thin. Na benvawn emaw tia kan ngaih hi, ruhmawih vanga ruhtliak emaw, tliak mai thei khawp a derdep te a lo ni thei a ni. A tliah hnua enkawl ai chuan inven a hlawk zawk tih chu i hai bik loh kha. Tin na benvawn hrim hrim hian inchhungkhur chet leh kohhran leh khawtlanga i nun a tikhingbai thei hle che a ni tih phei chu tumah inhrilh kan ngai lo ang.

Ei leh in lamah chuan nitina i ei, chaw leh chawhmeh (thlaihring lam te hlei hlei hi) te hi kaw pai nuamtawka puar a i ei theih chuan bu khat i let sa. Chu bakah chuan thei lampang te eitam a tha a, tui intam te hi peih lo tlang viau mah ila, taksa bung hrang hrang dangte tan nen a tha a ni tih hi sawinawn a ngai fo thin si a. Khawlchhuak leh vawnthatchi eitur leh intur te hi eitlem a tha a, zuk leh hmuam ti miin sim tum lo a sim hmiah a tha hle bawk.

Mahni phaktawk zela hma lain kum upat leh mihring nihphungin a ken tel osteoporosis hi do loin i tumna leh theihnain a theih chin chin ah i thunun thei ngei ang; chumi piah lamah chuan damdawi thiamna in thui tak a la penpui thei ang che. A tawpna erawhchu Pathian thu a ni thin.

Chhungkua, kohhran leh khawtlanga mi pawimawh ber mai hmeichhiate hian, taksa nihphung leh upat in a ken tel harsatna te hi hria in chumi mil a nunphung leh khawsak phung te her rem zel thiam hi ngailfima dama dinhmun pawimawh tak in chelh vawn chhunzawm zelna kawnga kailawna kechheh a ni tih hai loh a tha hle ang.


(He Thuziak hi scientific article a ni lova, Mipui mimir te hriatthiam tur a ziak a ni e. Kum 2009 khan ka pi kum za dam chuan chatuan ram min pan san a. Ka Pi kha Pathian zara mi hrisel tak a ni, a damchhung khan ruhtliak ilo a nei hauh lo. Amah hriatreng nan he natna hluar tak, hmeichhe tamtak tana phurrit ni mek chungchang hi ka han ziak a ni e. JL Chongthu)

Tuesday, September 28, 2010

Nun hi - Rose par mawi leh rimtui



















Nun hi! I dawn ngai em? Solomona meuh pawh khan a mawina zawng zawng inbel chung khan Hlobet tuktin par mawina pawh a tluk zo ngang lo a nih kha. Kan NUN par mawina hi vawikhat a chuai a a RAL chuan thawhhnihna a awm thei tawh si lo, THAWHLEHNA ni a kan chantur chu TUN huna kan nun hian a hril dawn chu a ni bawk si. Kan damlai nun par mawi hi vawikhat bak a VUL dawn si lo. I nun par vulmawi kha i vawng tha maw?
(Ziak duah lem lo hian, milem hian thu a lo sawi ve teuh thei a ni tih kan hai awm lo e, tha i ti maw, mawi i ti maw!, ka ti zet a ka ziak leh teuh tho mai).
Ka lawm e.
JL Chongthu.










































Wednesday, September 1, 2010

Rikrum thila ruhtliak sawngbawl dan.

He thuziak hi mi{5ual}.comah ka lo post tawh a, engemaw thila chhiar leh hrechiang duh in lo awm palh a nih hlauh chuan a hnuaia link ka dahah hian in hmet keuh mai dawn nia.



http://www.misual.com/2010/08/28/rikrum-thil-a-ruhtliak-sawngbawl-dan/



(Courtesy: Misual.com)


Ka lawm e.


J L Chongthu.


01/09/2010, 0056hrs.

Friday, August 27, 2010

Happy birthday to me!

Thitin thla ni 29, 1975 zanlai rik hma deuh hret khan harsatna lutuk nei lo in ka nu in Lungsen khuaah, kan unau zinga upaber dawttu ni tur in min lo hringchhuak a, vawiin hi ka birthday a lo ni leh ta reng mai. Zoram khawvel kha America thlaa inkapkai titi khan a la chiahhneh hle avangin kan awmna khuaah pawh chuan Armstrong-ate pawh chu anmahni hriat leh tur ni hauh lo hian an lo lar phian mai a, min chhartunu Nurse senior ve tawh tak chuan, "a chumin a ngo tha biang buang em mai, Armstronga i ti mai ang u", min ti pek a; ka nu leh pa te chuan zawm ta lem lo chuan tuna ka hming putlai hi min sak sak ta zawk a ni.



Tunah chuan mihring kum chhiar dan chuan kum 35 lai chu ka lo ni ve ta reng mai, Pathian min hruainaah ka va lawm em. Ka piantirh atanga harsatna em em tlakbuak lova vawiin ni thleng nungdama min siam a min hruai rengtu LALPA chu fakin awm rawh se ka ti lo thei lo. Chutiang bawkin min hmangaihtu zawng zawng te, in mi hmangaihna ka rulseng hauh lo a che u; "ka lawm e", tih hi ka sawi ve theih tawk a ni e. Mihring hi kan rawn pianchhuah phat atanga sual kan nih lai hian, fuke leh thlakima piang thei a kan awm hrim hrim pawh hi a ropuia, damchhung lawmman a ni tih hi i hai lo ang u. Chu chuan kan birthday hlutzia min hriatnawn tir leh thin ngei bawk sela.



Hmeichhia leh mipa chi an han intawn mai piah lama, naute a rawn insiam dan te hi hrilhfiah thiam a har hle a ni. Science tawngkam bungraw kimin sawifiah mai kan tum leh thin, nimahsela a rawn induanchhuah dan erawh hrilhfiah thiam a har hle thung a ni. Nuin nau a lo pai a, thla kaw chhung tehmeuh mai chhul chhunga naute a lo thanchhoh dan leh fuke kim biai a a lo pianchhuah mai thin dan te hi kan zira, kan sawi thin. A rawn induanchhuah dan leh a hlawhtlinna chu mihring kutah a awm lo tih hi hai rual a ni lo. Hriatna kim nei a, fuke kim biai a kan lo pianchhuah hian nu leh pa te tan chuan khawvel a Rohluber tluk hial a hlu ni awm reng kan ni! A ropuina leh a mawina hi ngaihtuah chian chauhin kan hrechhuak zawk thin a ni. Chumi piah lam, hun inher zel ruala puitlin lam kawng kan zawh hian 'birthday' hlutna hi kan theihnghilh ta fo thin a ni.



Pathian min hmangaihtu ruat ang zel a he khawvel eng ka lo hmuh tan ve na ni, tuna ka dinhmun thleng thei tura rahbi ka rah ve tan ni hi ka nuna a hlutzia leh a tel lo chuan ka tan "TUN HUN" hi a awm thei hauh lo a ni tih hre thar lehin mahni leh mahni "Birthday duhsakna sangber", ka inhlan nawn mawlh mawlh mai a ni.


"HAPPY BIRTHDAY TO ME"
J L Chongthu

29/08/2010, 0001 hrs

Friday, August 20, 2010

KHUMCHIKTHEI - A tirah chuan!

(Hriselna tih hming pu in Blog ka siam ve a, a thupui paw chhuak lo deuh deuh in thu ka ziak tlar leh thup mai bawk si a; mak ti fe fe chu kan awm ngei ang. Tun tum chu Khumchikthei lo chhuahdan ka han ziak teh ang).

Kum 1999 june thla laihawl kha a ni a, khua a lum ban chuap mai a. Summer vacation kan neih rei ve si lo a, haw lohah kan tlak ta ringawt mai a. Chhun nilum lai zawngin Libraryah AC vawt nuam tak hnuaiah internet kan browse thin a, khang hun lai te kha chuan a mik a mak kan hre lo lehzual a, hit and trial tak tak khan a ni kan tih ve tawp thin ni. E-mail ID kan han siam dawn a, hming danglam tak mai kha phuah a ngai tlatin ka hre ta a, ka han ngaihtuah vang vang a, miten awlsam taka an hriat mai nan tiin ka hming lamtawi jlchongthu@yahoo.com kha ka hmang ta a, khumchikthei tih chu ka rilruah pawh a la lang hauh lo mai.

Thlatam a lo vei meuh chuan mIRC a rawn lar viau tawh mai a, mizo thalai thaza chin kha chuan a chhun a zanin kan luhchilh ta mup mup mai a nih kha. Aizawlchat te a rawn hit tak viau hnu phei kha chuan 'nick' neih dangdai viau kha kan intihhmuh emaw ni tih mai tur a ni. Nick mumal em em pawh nei lem lo chuan kan chat ve ta fo mai a. Kei lah thenrual kawmthiam ve ta lo chu, min rawn simeikhu ve zeuh thin ho kha carreer leh value system tih vel ka lo sawipui chiam thin mai a, min be rei lo thin teh a sin.

Tlaikhat chu ka thianpa hian mi rawn phone a; an zinnaah khan mut hmun kha an lo duhtui tawh thin vak lo aniang, an khum kha a chik nasa hle thin a. Zing khawvar pentawng zunchhuak harh tawh lamah kha chuan mangchhe deuh kha chu "KHUMCHIKTHEI" a mu tih hriat fahran hian a chik tut tut tawh mai thin ni awm tak a ni. E he, tiin KHUMCHIKTHEI tih hi online a aliasah ka hmang tan ta a ni.

Chutia khumchikthei ka han nih takah chuan ka thil vei thin career, value system, thalai nun etc tih vel te hi ka vei nasa lehzual a; mut mawh hnar mawhah ka nei ta hial a ni. Ka thlirzauin ka han chik zel a, a takin ka khum pawh chu a lo chik ve thin a, kan hringnun kawng zawhah pawh hian thalai tamtak te hian kan hriatloh leh hmuhhmaihah hian kan khum hi a lo chik nasa ta hle mai tih ka hmuchhuak chho zel a ni.
Thangthar te hian kan nun hi nitin kan en chuan, nunkawng hrang hrangah hian .........
JL Chongthu.

Monday, August 9, 2010

Chawhchawrawi












Hetiang tal hi chu kan khuaah chuan a tum ve thuai ang chu maw.









Ramngaw tha pawh kan nei tawh lo chu a ni ber mai.










Chhumchungah thlawk in tih hla kha rilruah a lo lang.

Saturday, August 7, 2010

kan thil hlutphung!

(Hlutphung tiin ka han ziak ve leh tawp mai a, 'value system' tih ka sawi tumnaah ngaih mai chi a ni).

Thawkkhat lai khan Zoram khawvel hi thlipui nasa takin a nuai vel a chu chu 'Talent search' thlipui a nih kha; tunah tak hi chuan a mawngphe kan hmu tan tawhin ka hria. Kha thlipui che vel khan kan thil hlutphung a tilang chiang thawkhat in a lang! Kan awm ve na thingtlang khua, kartawp lama Mizo Kasauti kan lo en ve phakna chinah pawh naupang te te te pawhin "Lam ang ka lo let e", "A tur a na e", an ti al al thei a ni. A buatsaihtuten uluk taka duangin hlawhtling takin khan talent search te kha an bei a, an fakawm hle bawk. Amaherawhchu, Zoram mipui mimir tih theih deuhthaw mai in a kan phawklek pui a kan mut mawh hnar mawh titih mai kha chu a hnam naupan thlak in ka ngai tlat pek a ni.

Khawvel thangzel a hnam tlemte, chak taka thang kan ni tih hi tumahin kan hai awm lo e. Tuna thalaite hi nakin lawka fanau chawia enkawl liantur te chu kan ni mai. Zoram khawvel kalphung chawikanga siamtha zel tur hian kan nu leh pa te hun a liam tan a keini thalai thaza te hun a rawn inherchhuak mek a ni; mawhphurhna nasa tak kan koah a innghat a ni.Chuvang chuan kan chhehvela hnamdangte nena ke kan pen rual hian thil kan tih leh hmalakna reng rengah hian kan thil hlutphung hi a puitlingin belhchian a dawl tur a ni; chhim thli leh hmar thli tlehin a a chhem len tawn mai mai leh fur leh pawldelh ruahin a a nan zawr mai mai theih tur a ni hauh lo.

Kan chhehvel state leh a chhunga cheng hnam hrang hrang mai bakah mainland India mihring te hian min zir a, min chika, kan ke pen leh kechheh te hi chik tanin an thlir reng a ni. Chutiang kara kalphung nghet tak kan neih chhoh zel theihna tur chuan tuna thalai te hian keimahni rualpui (peer group) ah hian thil hlutphung nghet neih kan tum anga, kan tu leh fa lo la awm zel turte tana zirchian tlak, belhchian dawl leh entawntlak, nunphung kaihruaithei thil hlutphung chi tha tuh kan tum theuh tur a ni.

Chutianga thil hlutphung nei thei tur chuan hmalak dan kawng tamtak a awm thei ang. Mimalin kan sawi seng lo anga, hun leh hmun remchanga inzirtir theih te pawh a awm ngei ang. Mahni awmna, chenna leh hnathawhnaah theuh te ziak, sawi leh nunphunga lantirin a inzirtir theih bawk ang. Ngaihdan pawh a inang lo nuaih thei bawk anga, mihrang hrang ten ngaihdan leh rawtna te thawhkhawm chuan a tha, awm leh mawi chu a rawn inthlifim chhuak ve zel bawk ang.

Thil hlutphung tluangtlam nei tur a tul leh tha a ka ngaih te ka han tar chhuak ve chhin a, hengte hi thutawpna a ni lo a midang ten an belchhah atana kailawn rahbi hnuaihnung mai an ni:

1. Mizo Kristian kan ni a, kan Rinna nena inmil a nunphung leh rilru puthmang tluangtlam nei tur in inzirtir ang u. A tum pawh kan tum ang; mimal, nupa, chhungkua, kohhran leh khawtlangah, tin Pathian zarah kan hlawhtling ngei ang.

2. Mizo Tlawmngaihna hi a tum leh a kalphung, kan pi leh puten an lo chhawmnun thin ang khan i vang nung reng ang u.

3. Taihmakna leh thawhrimna te hi mitin tihmakmawh a ni tih hi kan thinlungah i tuhnung thar leh ang u. Heng tel lo hian zirna, hnathawhna leh eizawnnaah te hian a vawrtawp kan thleng thei tak tak ngai lo. Rinawmnain phuar ila, hruithum hrual chu chat rual loa fei leh tlo a ni ngei ang le.

4. Mahni hna, eizawnna leh kan laka beisei leh khawsak phungin a phut reng reng te hi a bu ang thlapa thiam tum leh bu let theih pui tum ruhna thinlung put i inzirtir ang u (naupang pawh, inchhungkhura a kum phu a a tih tur te te ah te pawh a rintlak in a rinngam theih a ni).

5. A tul hunah chuan Infak in inchawimawi ila, lawmthu kan inhrilh bawk thin tur a ni. Hei hian "kawng engkimah mai hian a lo inchawimawi theih a ni" tih thinglung min put tir thei ngei ang. Ngaihdam dil a tul hunah inphahhniam inzirtir i la, tlawm hunah thupha kan chawi ngam tur a ni. Hengte hian mi puitlingah mi a siam ngei ang.

Mi puitling chuan thil hlutphung fel tak a nei thin. Chu chu ni thei tur chuan Zoram Thalai, zoram khawvel nghahfak te hian hma i la zel teh ang u khai.

( He thuziak hi i lo chhiar ve a nih chuan, thil hlutphung siamtha tura rawtna i rawn thawh ve dawn nia)

JL Chongthu
Imphal
07/08/10

Saturday, June 5, 2010

Imphal war cemetry






Ka Blog Thupui Hriselna nen chuan ka thu han ziah hi chu a inhmeh lo viau maithei le. Engpawh ni sela, lo chhiar palh in awm chuan ngaihdan in lo siamthiam mai turah ka ngai e. Hriselna leh indopui lian pahnih (WW I & WW II) leh a tesep dangte khan inkungkaihna nasa tak an nei a ni tih hi hai rual a ni lo a, hmasawnna leh inenkawlna changkang zel hi khang indopui avang te a kan neih chhoh zel an ni ti ila a sual tam hauh lo ang.
Inzailam (surgical) specialityah ngat phei chuan indonaa inhliam sipai leh civil mite enkawlna atanga inzirchhoh leh hmuhchhuah thil tamtakin tuna medical khawvel hi a rawn herchhuahpui a ni ti tawkte pawh an awm thin, a dikna chin tamtak pawh a awm ngei a ni. German ral len laia Juda hnam te zinga medical research an tih rahchhuah tamtakte kha tunlai kan nitin nuna ngaia kan neih tak mai mai te hi an ni ta hlawm a, hnam in nuaichimih tumna leh kan mihringpui ten an lo tuar nasatzia nena heng thil te hian inkungkaihna an nei tih pawh hi mi tamtak chuan kan hre kher lo a, hriat mai theih pawh a ni hek lo. Indona rahchhuah ngei zawng a ni.

Ram leh hnam leh mihringpui ten nitin nun a zalen leh him zawka hun an lo hman theihnana nun pe te hi mahni ramah theuh chawimawi an ni thin a, an taksa hlawm tur awmlo pawh ropui takin an lo chawimawi thin a ni. Khawvel indopui liana thi te kha india ramah pawh an mahni hriatrengna thlan mual te kan lo nei ve reng mai a, hun remchang neih hlauh chuan heng hmun te hi fan ve ngei a tha hle mai.

Heng thlanmual te hi Commonwealth War Graves Commision (CWGC) buatsaih leh enkawl an ni. Kum 1917 khan Sir Fabian Ware an khawvel indopuia Kumpinu Lal ram leh a hnuaia a awp ram khua leh tui nihna nei nun chanta te hriatreng nan CWGC hi a lo din a ni. Khawvel ram 150 zetah hengtiang thlanmual 2500 lai te hi siam niin, India ram chhungah pawh pariat zet chu a awm a ni. Ruahmanna tha leh felfai taka duan an ni a, a mawi pawh a mawi a, rilru a khawihdan pawh a dang zar mai.

Imphalah hian India rama cemetry pakhat chu a awm ve a, fan ve chang ni hian a hmun a lo reh tha bawk a, hun liamta a kir leh ang te hian a inngaihtheih hial thin a ni. Thlanlung inang that mai, chi leh chi, hnam leh hnam, sipai leh civil, hotu leh lumum pawh thliar hrang lo a inang tlang dial a an intlar pat mai han hmuh chuan suangtuahnain kawng a bo lek lek thin; hlaphuahthiam han ni ila ruahthamloha hla han phuah mai te pawh a chakawm thei khawp mai.

Thlanlung 1600 zet a awm a, heng zingah hian mizo leh mizo hnahthlak niawm tak te pawh an awm ve nual. An chhungte tuna la dam te hian an hre ngei turah ka ngai ringawt mai. Remchanga imphal i kal a nih chuan Imphal War Cemetry hi i tlawh ve ngei dawn nia.