Mihring pakhat te mai hi chai tham anih zia chu kan hre theuh awm e. Han ngaihtuah ve teh. Kan nitin hun hman a kan hnathawh zawng zawng deuhthaw hi, he taksa riang te, vaivut a chang leh mai tur atan vek a lo ni. Kan ei kan in, kut ke leh thluak hmanga kan hnathawh te hian enge a tum. He lei a cheng, a la dam ten nuam zawk leh hlim zawk a kan damchhung hun tawite kan hman theihna tur atan mai a ni lawm ni? Pathian min ruahman dan erawh a ni thung.
Thiamna leh zirna lamkawngah pawh chu ti tho; hmasawnna lamtluang sawn zau tum vang mai a chu ti lam kawng zawh chu kan ni si a. Zirna in lah chi hrang hrang a tam. Ka field bik, hriselna lam te hi maw, ti hian ka ngaihtuah mai mai pek a lawm maw le:
That lai hun kum li leh a chanve ngawt mihring taksa, a hnathawh dan leh natna tlakbuaktu hrang hrang, a enkawl dan leh a inven dan thlengin thanglai thluak in a a tlin bak bak thleng lek lekin kan zir ve a, a tam zawk phei chuan a sual in kan sual titih deuh tak tak a ni. A hun lai chuan a nuam ve mai! Tun hnua ka ngaihtuah let leh thin hian a lo hahthlakzia leh tan mar pat a ngai thin zia kha ka hrechhuak thin, in ‘saihruipawh’ te hi kan ang ka ti lek lek.
Chutiang a chipchiar angreng tak a kan zir tawh emaw ka tih lai chuan zirchian lehzualna kawng la zawh a la ngai leh cheu ta. Huiha, peih loh chuan hmalam hun chu ruahthimpui ang, luhchilh erawh chuan kum thum chhung chu se ruah do deuh tawp a ngai thung. Hun erawh a inher ve bek bek a, a lo ral ve mai thin.
Kum hnih leh a chanve zen zawn ngawrh tak leh rim taka kawla nichhuak chhiar a hna ka thawh hnu in, a ai a ngawrh leh nasa lehzualin lehkha ka han chhiar leh a nih kha, sikul naupang ka ni tha leh hi a ni ber mai. Chhiar sen loh tak tak hi a lo ni! Kan chhiar zo ve leh tho mai chu a nia. ‘Tiau luipui fawn kan thlen meuh chuan, i he lovin lei chu kan mai a tul!’
Thenkhatin taksa ruangam; ruh leh ruh chuktuah, tihrawl leh thazawm lam ngawr ngawr an zir a, a thenin natna hrik lam. Chutiang bawkin a thenin beng hnar hrawk chauh an thlur bing a, a dangin mit chauh. Mihring taksa bung leh peng hran zawng zawng mai hi. Zirmi za rual zet zawt in kum thum ngawt, thiamlehzualna beisei leh bawhzuiin mihring taksa bung leh peng hrang a bika han beih pawhin, hriat vek theih a ni lo. Hriat sen a ni bawk hek lo. Hriat vek tum chu at so ang deuh a ni. Chu mai chu a la ni nang, ‘zirchian lehzualna bak zirlehna’ te an la ti ta deuh deuh a, tawpintai a nei lo! An zirsang tial tial a, an hre zim tulh tulh a, an hre chipchiap thung a. Eng vang a chutia bei chiam nge kan nih le, e le, kan mihringpui te hmalam nawmsakna tur atan bawk maw le.
En mai pawh a derdep ve tak, belhchian a fip tel, lepse a sak talh thung si, hriat sen loh leh thiam sen loh hi he mihring taksa riang ve takah hian a lo inkhungkhawm chu ni in. Pathian min siam dan tak hi chu aw! Dawn chian chuan mak hlir; fuke kim a duan, thi lo a piang, lung chuih bah palh hauh lova i lo seilian mai te kha a mak zia chu i zirchian poh leh i hria ang. Pathian min siamdan hi a mak, hriselna hi a hlu. Dam mawh hritlan theihna kawng za tam a awm, dam a kan awm hi i lawm ang u. Damloh hrehawm zia hre ve lek lova hrisel tha te phei chu ‘Halleuluia’ thawt thawt awm hliah hliah an ni. Chu zawng ai chuan invenna hi a pawimawh lehzual, kan hria. Fimkhur chintawk a awm lova, midang hmuh a mawi lo khawp a fimkhur luattuk erawh a awm thei. Dai theu chin tawk thiam a ngai viau a ni. Nangma tan a chakai khawrh i ni, theihnghilh hauh suh ang che.
Nungdama kan awm hi i lawm ang u. Hrisel kan ni hi i hlim ang u. He taksa tlawm te, khirh ru reuh zek si hian khawvel kalphung hi a hawlhkal a, a tuaiherin a sawh tir tawk tawk thin. Tuna i awm anga i awm mai pawh kha, a sum hlutnaachhut chuan chhut sen rual loh a ni ta ve ang. I hriselna kha lo vawng tha mawlh rawh, i inhriat ai khan i taksa riang te kha a khirh ru zek a nia aw.
...khrum
JL Chongthu
[Thiante u ka han ziak ve leh nuaih e, han comment teh u lem, article ziah ve ka tum deuh a, a ruangam ka han duang a, in comment te feedback a hmangin ka chul mam leh ang, ka lo ngaichang reng dawn e, ka lawm e.
...khrum]
Ekhai, tawngkam i lo thiam khawp mai. Wordplay lam pawh ti duh tak tak la chuan i thei dawn hle a ni tih paragraph 7-na ka chhiar atangin ka hria.
ReplyDeleteI thlir dan kawnga han thlir chuan a lo ni khawp mai. Taksa peng hrang hrangte hian anmahni pual bik doctor an nei theuh zu nia. (I hrechiang ber) Chuta tang ringawt paw'n he taksa ruangam dintu themthiamzia leh ropui tur zia chu a lang nghal reng mai.
Hringnun hi zirnain a khat e. Zir zawh a awm lo, zir tawp lah a awm chuang lo. Zirtawpni kan tih pawh hi Inrinni-in a zui a, a hnu rei lo te-ah thawhtanni-in a zui leh nghal mai hi. Zir lo kan awm lo, a taima fal erawh an hlawhtling bik chu a nih hi.
A ngaihnawm khawp mai. Chhiar a nuam e. Article tha deuh i ziak dawn nia..
Ku TS, mai mai thin a. I ti lawmawm tho tho e. Nia ziak ngei chu ka tum dawn chiang.
ReplyDelete...khrum
He khawvela nunna nei zawng zawng zingah mihring taksa hi a danglam ber a, a ropui ber bawk. Heti taka danglam leh ropui bik hi, zawng thlah mai mai kan ni thei lo hrim hrim. A zir zau leh zir ril apiangin mihring taksa ropui zia an hria. A thilsiam mah a ropui anih chuan a Siamtu phei chu a va lo ropui dawn tak em.
ReplyDeleteTunah chuan i zirbelh pawh i lo zo ta maw. A lawmawm e. Zirna avanga inkhurbing a ngai tawh dawn si lova, i blog ah thu tha tak tak chhiar tur a awm reng kan beisei tawh dawn nia.
I line hi mite tanpui nan a tha ber. Mite tana malsawmna nih theihna hnaivai ber niin ka hre thin.
ReplyDeleteTunlai chu Specialist-na(on line learning) hi a hluar tawh khawp a, pa pakhat pawh hi a mit a inentir a Doctor chuan kei chu 'mit dinglam specialist ka nia, veilam ka en ngai a lo ti e' an tih chu. Tak tak pawh ni lo mahse thiam dawn chuan zir bing hi a tul hle reng a ni.
Eng line pawh hi han zir ila, lehkhabu chhah pui pui hian min lo hmuak khap mai zel zawng anih hi. Mifate hi an lo advance khawp.
Nia, hrisel hi a man a lo va tam em ka ti thin. a hlu, a hlu ngawih ngawih. Damdawiinahte hian a hlutzia hre tura kal zeuh zeuh tur. Ka lawm e.
i zir belhna a i hlawhtlin avangin ka lawmpui a che.
ReplyDeleteAn zirsang tial tial a, an hre zim tulh tulh a, an hre chipchiar thung a..... dik si nalh bawk si.
volume 1
Caribou: Hotupa ka lawm e. Nia, kan tum zel ang chu.
ReplyDeleteRpP: Hotupa, nia tiraw. I tidik khawp mai.
Volume 1: A pu chu ka blog te i rawn tlawh a i ti lawmawm hle mai. Ka lawm tak meuh meuh e.
...khrum
Va ngaihnawm ve! Sam ziaktuin, "Hlauhawm tak leh mak taka siam ka ni" a tih hi a lo dik dawn khawp mai! Han ziak zel rawh khai!
ReplyDeleteE khai i thuziak chu ka rinloh lam zawngin i her daih mai a. Khawvelah hian thil hlu leh tha niawma lang hi an tam a ni e...kan hriselna leh chatuan nunna erawh a hlut zia hi sawi thiam a har a ni.
ReplyDelete