Ka Blog Thupui Hriselna nen chuan ka thu han ziah hi chu a inhmeh lo viau maithei le. Engpawh ni sela, lo chhiar palh in awm chuan ngaihdan in lo siamthiam mai turah ka ngai e. Hriselna leh indopui lian pahnih (WW I & WW II) leh a tesep dangte khan inkungkaihna nasa tak an nei a ni tih hi hai rual a ni lo a, hmasawnna leh inenkawlna changkang zel hi khang indopui avang te a kan neih chhoh zel an ni ti ila a sual tam hauh lo ang.
Inzailam (surgical) specialityah ngat phei chuan indonaa inhliam sipai leh civil mite enkawlna atanga inzirchhoh leh hmuhchhuah thil tamtakin tuna medical khawvel hi a rawn herchhuahpui a ni ti tawkte pawh an awm thin, a dikna chin tamtak pawh a awm ngei a ni. German ral len laia Juda hnam te zinga medical research an tih rahchhuah tamtakte kha tunlai kan nitin nuna ngaia kan neih tak mai mai te hi an ni ta hlawm a, hnam in nuaichimih tumna leh kan mihringpui ten an lo tuar nasatzia nena heng thil te hian inkungkaihna an nei tih pawh hi mi tamtak chuan kan hre kher lo a, hriat mai theih pawh a ni hek lo. Indona rahchhuah ngei zawng a ni.
Ram leh hnam leh mihringpui ten nitin nun a zalen leh him zawka hun an lo hman theihnana nun pe te hi mahni ramah theuh chawimawi an ni thin a, an taksa hlawm tur awmlo pawh ropui takin an lo chawimawi thin a ni. Khawvel indopui liana thi te kha india ramah pawh an mahni hriatrengna thlan mual te kan lo nei ve reng mai a, hun remchang neih hlauh chuan heng hmun te hi fan ve ngei a tha hle mai.
Heng thlanmual te hi Commonwealth War Graves Commision (CWGC) buatsaih leh enkawl an ni. Kum 1917 khan Sir Fabian Ware an khawvel indopuia Kumpinu Lal ram leh a hnuaia a awp ram khua leh tui nihna nei nun chanta te hriatreng nan CWGC hi a lo din a ni. Khawvel ram 150 zetah hengtiang thlanmual 2500 lai te hi siam niin, India ram chhungah pawh pariat zet chu a awm a ni. Ruahmanna tha leh felfai taka duan an ni a, a mawi pawh a mawi a, rilru a khawihdan pawh a dang zar mai.
Imphalah hian India rama cemetry pakhat chu a awm ve a, fan ve chang ni hian a hmun a lo reh tha bawk a, hun liamta a kir leh ang te hian a inngaihtheih hial thin a ni. Thlanlung inang that mai, chi leh chi, hnam leh hnam, sipai leh civil, hotu leh lumum pawh thliar hrang lo a inang tlang dial a an intlar pat mai han hmuh chuan suangtuahnain kawng a bo lek lek thin; hlaphuahthiam han ni ila ruahthamloha hla han phuah mai te pawh a chakawm thei khawp mai.
Thlanlung 1600 zet a awm a, heng zingah hian mizo leh mizo hnahthlak niawm tak te pawh an awm ve nual. An chhungte tuna la dam te hian an hre ngei turah ka ngai ringawt mai. Remchanga imphal i kal a nih chuan Imphal War Cemetry hi i tlawh ve ngei dawn nia.
